گونئی آزربایجان اراضی سی ایران آدلانان اؤلکه نین ایچینده بیر سؤمورگه و یاخود مستعمره کیمی گؤرونوب ایران رژیمینین باسقیسیندان قورتاریلماسینا چالیشیلیرسادا بو مجادله نین دنیا بویوتلو اولدوغو اونودولورسا تؤکولن قانلار، وئریلن امکلر، چکیلن زندانلار و بوتون جهدلر دوغرو دوزگون بیر سونوجا چاتمادان پوزولابیلر.

باغلی قاپیلار آرخاسیندا گلجک دونیانین گؤرونن و گؤرونمیین خریطه لرینی چیزمگ اوچون تارتیشیلان گیزلی سیاسی مباحثه توخونمادان بوگونکو رسمی تورک اؤلکه لری و جمهوریتلری نین خریطه لری و اونلارین یئراوزندکی ارتباطلارینا باخدیغیمز زامان تورکیه ایله هئچ بیر توپراق باغلانتی لاری نین اولمادیغی اوزه چیخیر. اصلینده دوغال اولاراق بو باغلانتی مینلرجه ایلدن بری وارایمیش آنجاق سون ۱۵۰ ایلده سیاسی و اقتصادی منافع لردن دولایی تورکلرین توپراق بیرلیگی، گوجلو دولت لر طرفیندن پوزولوبدور و پوزولماقدادیر.

بو توپراق آییریلتیسینی قوووشدوروب بیرلشدیرن یالنیز گونئی آزربایجان توپراقلاری دیر. گونئی آزربایجان اوزریندن تورکیه، قوزئی آزربایجان، تورکمنستان، قازاقستان، اوزبکستان و قیرقیزیستان اؤلکه لری تورک اولمایان هئچ بیر دولتین گوی، یئر و یاخود سویوندان گئچمدن بیر بیری ایله ارتباطدا اولا بیلیرلر. یابانجی اؤلکه لر کیمیسی سوی سئورلیغیندن، کیمیسی گئچمیشدکی کینه لریندن، کیمیسی آنتی تورکلوغوندن، کیمیسی اقتصادی منافعلردن و کیمیسی ایسه تورکلرین یئنیدن گوجلنیب بیرلیک یارادماسیندان قورخوب و اونلارین بیر بیری ایله واسطه سیز باغلانتی لاری نی انگلله مگه پلانلار حاضیرلاییبلار. یوزلرجه ایل بوندان اول حاضیرلانان بو پلانلارین ان یاخین اؤرنکلریندن بیری داغلیق قره باغ اشغالی دیر.

ایللردیر بوتون عاقللی و اؤزگور ارمنی تحلیلچی لر داغلیق قره باغین اشغالینی داشناکلارین ان بویوک خطاسی کیمی تانیدیریرلار نیه کی بو اشغال ارمنی ملتینی بؤلگه ده ایزوله ائدیب، بین الملل معاهده لرده اشغالچی تانینال ارمنستان دولتی نی ده روسیه نین کؤله سینه دؤندریب. بو ارمنی آراشتیرماجی لار داشناک لارین مللتچیلیک دوشونجه سینی روسیه نین ائتکیسی ایله سوی سئورلیگه دؤنمسین چوخ بلیرلی و اثبات اولموش کیمی آرایا قویورلار.

تورک توپراقلاری نین بیر بیری ایله باغلانتی نقطه سی گونئی آزربایجانین تورکیه ایله سینیری (باغلانتی سینیرلاری)، ایللردیر کی  قونداراما بویوک کوردستانین بیر پارچاسی تک تبلیغ اولونور. بو پروژه اساسیندا گونئی آزربایجانین باتی سی کورد مللتچیلیک قابیغیندا فعالیت ائدن ترورچو قروپلار طرفیندن اشغال و سوی تمیزلیگی ایله هده لنیر. باشدا آمریکا دولتی بیر نئچه آوروپا اؤلکه لری ایله بیرلیکده سوریه نین قوزئیی اؤزللیکله عفرینده سیغیشان پ ک ک/پ ی د و اونلارا باغلی ترورچو قروپلاردان هر تورلو مالی، نظامی و سیاسی حمایتله بو پروژه نین اصلی یورودنلری تک گؤرونورلر.

سولدوز اولای لارین نظرده آلماساق، گئچمیشده باغلانتی سینیرلاریمیز ایکی دفعه کورد چته لری (شیخ عبیدالله شمزینانی و اسماعیل سمیتقو) و بیر دفعه ده ارمنی چته سی (جیلولوق فاجعه سی) طرفیندن باسقی و سوی قیریمینا معروض قالیبدیر. باغلانتی سینیرلاریمیزدا کوردلری یئرلشدیرمک اوچون بؤلگه ده یاشایان یئرلی تورک مللتینی قیرغین و امنیت سیزلیگله کؤچمگه مجبور ائتدیلر. بو گونکو تروچو قروپلاری نین اویونلاری همان پروژه نین آردیندا پلانلاشیبدیر. نئجه کی داغلیق قره باغین ارمنی داشناک لار طرفیندن اشغالی تورکیه ایله قوزئی آزربایجانین توپراق باغلانتی سین انگلله دی، گونئی آزربایجانین باتی سینداکی اشغال پروژه سی ده بوتون تورک دنیاسی نین باغلانتیسین هدف آلیبدیر.

بؤیوک بیر تورک بیرلیگی نین یاردیلماسی و اونون آردیندان یاران سیاسی، نظامی گوجون تهلیکه سی بیر طرفده دورورسا، اورتا آسیاداکی تورک اؤلکه لرینین انرژی، انسانی و توپراق گئنیشلیگی تورکیه ده کی صنعتی گلیشمه و سیجاق سولار یولو ایله بیرلشمه سی آمریکا و آوروپا اؤلکه لرینین اقتصادی منافعینی چوخ جدی شکیلده خطره سالابیلر. بو اوزدن گونئی آزربایجانین باتی سی کوردستان خریطه سینده یئر آلمالی دیر. نیه کی گلجکده یارانا بیلن کوردستان اؤلکه سی نه قدرده بویوک اولورسا اشغال ائلدیگی توپراقلاردان دولایی قونشولاری ایله دشمنلیغی بیتمییب و هر زمان آمریکانین الینده بیر کؤله تک قولانیلاجاق.

بو آرادا گونئی آزربایجانین باتیسی ایله علاقه ده ایران رژیمی نین توتدوغو سیاستلر چیزیلن پلانلارلا اوست اوسته اوتورب کوردلرین بو بؤلگه ده یئرلشمه سینه یاردیم ائلیر. ایران رژیمی نین فارسچی سوروملولاری دا گلجک فارسیستان اؤلکه لری نین خیرینی تورکلرین بیرلشمه سینده گؤره بیلمیر. طبیعی دیر کی بو طرز داورانیشلاری نین بیر اوجودا آنتی تورکچولوق لریندن آسیلی دیر.

البته بو اونلارین نقشه سی دیر بلکه تورکلرینده بو پلانلار و پروژه لرین اؤنونده چؤزوملری وار. بلکه ده گونئی آزربایجانین دعواسی اورمودا یوخ عفرینده، کرکوکده و طورخوزماتودا یورودولور.