صونا فرج‌زاده: حیات یولداشیمین حؤکمونو دییشمه‌دیلر
ایرانین عالی محکمه‌سی بو یاخینلاردا هر بیری دوققوز ایل حبس جزاسینا محکوم ائدیلمیش و بیر ایلدن آرتیقدیر حبسده ساخلانیلان یئنی گونئی آزربایجان میللی اویانیش حرکاتینین (یئنی گاموح) بئش مرکزی کومیته عوضوونون آپپئلیاسییا(درخواست) شیکایتینی ردد ائدیب.
محبوسلاردان بیری یوروش مهرعلی‌بیلی نین خانیمی صونا فرج‌زاده حیات یولداشی و دیگر دؤرد محبوسون دورومو حاقیندا آمئریکانین سسینه موصاحیبه وئریب. اؤزو ده اؤتن ایللرده حبس و موحاکیمه‌یه معروض قالمیش گونئیلی موعلیمه همچنین حسن روحانی حؤکومتینین سیاسی محبوسلار و غئیری- فارس توپلوملارین حقوقلاری ایله باغلی وئردیگی سؤزلر حاقیندا دوشونجه‌لرینی ایفاده ائدیب.
“بو، غئیری- اینسانی، غئیری- حوقوقی حؤکمدور،” دئیه صونا فرج‌زاده محکمه‌نین قرارینی شرح ائدیب. اونون دئدیگینه گؤره گونیئلی محبوسلار آزربایجان توپلومونون ائلئمئنتار(ابتدایی) حقوقلاری اوغروندا موباریزه آپاردیقلارینا گؤره جزالاندیریلیرلار.
یوروش مهرعلی‌بیلی (آیت)، لطیف حسنی، محمود فضلی، شهرام رادمهر و بهبود قولوزاده اؤتن ایلین اییول و آوقوست آیلاریندا ۲۸ گون آجلیق آکسییاسی کئچیرمیشدیلر. همین گونلرده آمئریکانین سسینه موصاحیبه وئرن یئنی گاموح تشکیلاتین باشقانی لطیف حسنی‌نین خانیمی اعظم پیری‌نین سؤزلرینه گؤر، بئش محبوس سورغو-سوال و موحاکیمه پروسئسلرینده باش وئرن قانونسوزلوقلار، اونلارا قارشی چیخاریلان آغیر حبس جزاسی، هابئله درخواست محکمه‌سینده حقوقی پروسئدورون(روش) پوزولماسینا اعتیراض اولاراق آجلیغا باشلامیشدیلار.
صونا فرج‌زاده ده کاسساسسییا شیکایتینین محکمه پروسئدورونده یول وئریلمیش قانونسوزلوقلارا اعتیراض ماهیتی داشیدیغینی قئید ائدیب. اونون دئدیکلرینه گؤر، کاسساسسییا شیکایتی وئریلن جزانین ایره‌لی سورولن ایتتیهاملارلا موتناسیب اولماماسی، ایتتیهاملارین سندسیز شکیلده ایره‌لی سورولمه‌سی و محبوسلارا مودافیعه اوچون یئترلی زامان وئریلمه‌مه‌سی کیمی خوصوصلارا اساسلاناراق حاضیرلانمیشدی.
اؤتن ایل آجلیق آکسییاسینا باشلادیقلاری زامان تبریزدن کرج‌ین رجایی شهر زیندانینا سورگون ائدیلن یئنی گاموح لیدئرلری سون زامانلاردا تکرار تبریز زیندانینا کؤچورولوبلر. صونا خانیمین سؤزلرینه گؤر، “محبوسلارین تبریزه کؤچورولمه‌سی تبریزه یاخین بؤلگه‌لرده یاشایان عاییله‌لر اوچون یاخشی خبر اولوب، آنجاق، محبوسلاردان بیری لطیف حسنی‌نین عاییله‌سی کرج شهرینده یاشاییر و ایندیکی شراییط اونلار اوچون چتین اولاجاقدیر.”
صونا فرج‌زاده همچنین پرئزیدئنت حسن روحانی‌نین سیاسی محبوسلارین دورومو و غئیری- فارس ائتنیک قروپلارین حوقوقلارینا دایر وئردیگی سؤزلر، ائلجه‌ده ایرانین غئیری- فارس ائتنیک قروپلار و دینی آزلیقلارلا باغلی مسئله‌لری اوزره پرئزیدئنت یاردیمچیسی علی یونسی‌نین بو یاخینلاردا آنا دیللرینین تدریسی حاقیندا صؤحبتلری ایله باغلی اؤز دوشونجه‌لرینی آمئریکانین سسی ایله پایلاشیب.
بو وعدلرین عومومیتله صمیمی اولمادیغینا اینانان فرج‌زاده‌نین دئدیکلرینه گؤره، علی یونئسینین وضعیفه‌سی غئیری- فارس ائتنیک قروپلارین مسئله‌لری ایله علاقه‌لی اولسا دا، او همین جمعیتلرین حاقلارینی مودافیعه ائتدیکلری اوچون دوققوز ایل حبسه محکوم اولونموش فعاللارین عاییله‌لرینین سؤزلرینی ائشیتمه‌یه حاضیر اولمور.
صونا خانیم کیچیک اوغلو تاتارین آتاسی اوچون داریخدیغینی سؤیله‌ییب: “تاتارین آتاسینا چوخ احتییاجی وار. او، چوخ داریخیر.”
آمئریکانین سسی / علیرضا قولونجو
بو یازی تبریز سسی امکداشلاری طرفیندن عرب الیفباسینا کوچورولوبدور