تورکیه‌ده تورک دیل بایرامی قوتلانیر
تورکیه‌ده بیرینجی تورک دیل قورولتایی‌نین توپلاندیغی گون اولان ۲٦ سپتامبر ۱۹۳۲، قورولتایدا آلینان قرارلا دیل بایرامی اولا‌راق قوتلانیر. بو قورولتای، آتاتورک‌ون قوردوغو تورک دیل قورومونون ایلک قورولتایی‌دیر.
بو چرچیوه‌ده دؤولتین ذیروه‌سین‌دن “تورک دیل بایرامی” مئساژلاری گلدی. پرزیدنت عبدالله گول، تورکجه‌نین مدرن بیر ائییتیم، بیلیم و مدنیت دیلی سویه‌سینه چاتدیغینی ایفاده ائده‌رک، “بو قورور وئریجی سویه‌نی داها یوکسک‌لره داشیماق هامیمیزین اورتاق مسئولیتی‌دیر” دئدی.
تورکیه بؤیوک میللت مجلیسی باشقانی جمیل چیچک ده تورک دیل بایرامینی قوتلادی. چیچک مئساژیندا “بیزی میللت ائدن ان اؤنم‌لی دیرلریمیزدن بیری تورکجه‌میزدیر. کیملیگیمیزین تملینی تشکیل ائدن تورکجه‌میز، بیزلری اورتاق هدفده بیرلشدیرن، اورتاق دویغولاری یاشا‌دان ان کؤک‌لو وارلیغیمیزدیر” دئدی.
باشباخان رجب طیب اردوغان دا، دیل بایرامی موناسیبتیله مئساژیندا “اینانیرام کی باریشین، سئوگی‌نین و خوش‌گؤرو ایقلیمی‌نین عینی قازاندا اریدیلدیگی بو جغرافیادا جوجرن و بؤیوک بیر چینارا چئوریلن گؤزل تورکجه‌میز، یونوس امره‌نین، مؤو‌لانانین، حاجی بکتاش ولی‌نین و داها نئچه‌لری‌نین ائورنسل مئساژلاری‌نین بوتون اینسانلیغا چاتماسینا خیدمت ائتمه‌یه داوام ائده‌جک” دئدی.
تى ار تى
