Küveyt Cinayət Məhkəməsi İslam Respublikası ilə əməkdaşlıq etmək və Hizbullaha üzv olmaq ittihamı ilə üç kişini edam cəzasına məhkum edib. Kuwait Times-ın məlumatına görə, onlar Küveytin baş nazirinin birinci müavini, daxili işlər naziri Fəhd əl-Yusif əs-Sabaha sui-qəsd planı hazırlayıblar.
Qəzetin yazdığına görə, təqsirləndirilənlərin bəziləri bu planda partlayıcı maddələrdən istifadə etmək istəyib. Onlardan biri həm də bu maddələri Küveytə gətirməyə cəhd etməkdə ittiham olunur. Küveytin maraqlarına zərər vurmaq da bu şəxslərə qarşı irəli sürülən digər ittihamlardandır.
Fransa Press agentliyi iki məhkəmə mənbəyinə istinadən xəbər verib ki, Hüseyn Abdullah Matuq da məhkum edilənlər arasındadır. O, şiə ruhanisi və «Milli İslam Koalisiyası»nın baş katibidir. Məhkum edilənlərdən biri isə daha əvvəl, 2016-cı ildə terrorizmlə bağlı bir işdə məhkum olunub.
