Yaponiya "Böyük yeddilik" (G7) ölkələrinin bazara 100 milyon barrel neft və yanacaq məhsulları çıxarılması barədə razılaşmasına baxmayaraq, hazırkı mərhələdə milli ehtiyatlarından əlavə xam neft buraxmaq planı olmadığını açıqlayıb.
Reuters-in məlumatına görə, Yaponiya Nazirlər Kabinetinin baş katibi Minoru Kihara bazar ertəsi bildirib ki, Tokio artıq neft ehtiyatlarının bir hissəsini bazara çıxarıb və "bu mərhələdə" yeni buraxılış planlaşdırmır. Yaponiya mart ayında beynəlxalq səviyyədə əlaqələndirilmiş tədbirdə iştirak etmək üçün ehtiyatlarından təxminən 80 milyon barrel ayırmış, may ayında isə buraxılışın növbəti mərhələsini həyata keçirmişdi.
G7 ölkələri cümə günü enerji qiymətlərinin artmasına cavab olaraq təcili ehtiyatlardan 100 milyon barrel xam neft və dizel yanacağı buraxmaq barədə razılığa gəliblər. Bu həcmin nə qədərinin Beynəlxalq Enerji Agentliyi üzvlərinin əvvəlki 400 milyon barrellik planına əlavə olacağı hələ məlum deyil. İndiyədək əvvəlki planın təxminən üçdə ikisi icra olunub.
