"Qadınlar, sülh və təhlükəsizlik indeksi" adlı ən son hesabat göstərir ki, İran 0,608 bal ilə dünyanın 181 ölkəsi arasında 128-ci yerdə qərarlaşıb və cədvəlin aşağı üçdə birinə düşüb. İran bu reytinqdə Liviya və Namibiya ilə eyni bala sahibdir.
İranın quru sərhədi olan qonşuları arasında Ermənistan 56-cı, Türkmənistan 74-cü, Türkiyə 106-cı və Azərbaycan Respublikası 111-ci yerdə olmaqla, hamısı daha yaxşı vəziyyətdədir. Yalnız İraq 158-ci, Pakistan 169-cu və Əfqanıstan 181-ci yerlə İrandan aşağıda qərarlaşıb.
Hesabat həmçinin göstərir ki, reytinqdə iştirak edən altı müstəqil türk dövlətinin hamısı İrandan yuxarı yerdə dayanır: Qazaxıstan 72-ci, Türkmənistan 74-cü, Qırğızıstan 84-cü, Özbəkistan 98-ci, Türkiyə 106-cı və Azərbaycan Respublikası 111-ci yerdədir.
Ərəb dünyası ilə müqayisə də böyük fərqi ortaya qoyur. Birləşmiş Ərəb Əmirlikləri 20-ci, Bəhreyn 55-ci, Oman 58-ci, Səudiyyə Ərəbistanı 63-cü, Küveyt və Qətər 70-ci, İordaniya isə 88-ci yerlə xeyli irəlidə qərarlaşıb. Tunis, Mərakeş, Əlcəzair və Misir da İrandan öndə yer alıb. İrandan aşağıda olan ərəb ölkələri əsasən müharibə və ciddi qeyri-sabitliklə üzləşənlərdir; o cümlədən İraq, Fələstin, Somali, Sudan, Suriya və Yəmən.
İranın ən mühüm zəif tərəflərindən biri qadınların yalnız 14,8 faizinin işlə təmin olunması, onların parlament kürsülərindən cəmi 4,9 faizinə sahib olması və qanuni ayrı-seçkiliyin olmaması sahəsində 100 baldan 31,3 bal toplamasıdır. Hesabatda İran öz regional qrupu daxilində qadınların məşğulluğu baxımından ən zəif ölkə kimi göstərilib.
Bu indeks Corctaun Universitetinin Qadınlar, Sülh və Təhlükəsizlik İnstitutu tərəfindən Oslo Sülh Tədqiqatları İnstitutunun əməkdaşlığı ilə hazırlanıb. Bununla belə, məlumatların əksəriyyəti 2024-cü il və ondan əvvəlki dövrə aiddir və yalnız parlamentdə təmsilçilik göstəriciləri 2025-ci ilə aiddir; buna görə də hesabat nəşr olunan ən son versiya olsa da, 2025 və 2026-cı illərin tam gedişatını əks etdirmir.
