ABŞ Prezidenti Donald Tramp bildirib ki, Vaşinqton və Tehran arasında əldə olunan razılaşmanın imzalanması 15 iyun 2026-cı il, bazar günü üçün planlaşdırılıb və sənəd imzalandıqdan sonra Hörmüz boğazı bütün ölkələrin istifadəsi üçün açılacaq.
ArazNews-un məlumatına görə, Tramp sosial şəbəkə hesabında paylaşdığı mesajda iddia edib ki, İranla yeni razılaşma JCPOA-dan fərqli olaraq “İranın nüvə silahı əldə etməsinin qarşısını alacaq”. O bildirib ki, İran İslam Respublikası nəinki nüvə silahına sahib olmayacaq, hətta artıq buna maraq da göstərməyəcək.
ABŞ prezidenti həmçinin iddia edib ki, razılaşmanın imzalanmasından sonra Vaşinqton və Tehran arasında münasibətlər yeni mərhələyə qədəm qoyacaq və bu razılaşma çərçivəsində ABŞ tərəfindən İrana heç bir maliyyə ödənişi həyata keçirilməyəcək.
Tramp çıxışının digər hissəsində İranın nüvə ehtiyatlarına toxunaraq bildirib ki, ABŞ münasib vaxtda İranın yeraltı nüvə obyektlərində saxlanılan nüvə materiallarının toplanması və məhv edilməsi istiqamətində addımlar atacaq.
O, sonda razılaşmanın icrasının sürətli və gərginliksiz şəkildə həyata keçiriləcəyinə ümid etdiyini bildirib, lakin prosesin uğursuzluğa düçar olacağı təqdirdə ABŞ-ın “son variantını” qoruyub saxladığını vurğulayıb.
