İslam Respublikası ordusu bu gün, noyabrın 13-də, cümə günü Hörmüzgan əyalətinin Kuhestək bölgəsində ABŞ-a məxsus MQ-1 pilotsuz uçuş aparatını vurduğunu iddia edib. Dövlət mediası yazıb ki, PUA ordunun Hərbi Dəniz Qüvvələrinin «yeni hava hücumundan müdafiə sistemi» ilə zərərsizləşdirilib. ABŞ ordusunun Mərkəzi Komandanlığı (CENTCOM) hələlik bu iddiaya münasibət bildirməyib.
Həmin gün səhər saatlarında İslam İnqilabı Keşikçiləri Korpusu (SEPAH) Bəhreyndəki ABŞ qüvvələrinin erkən xəbərdarlıq radarını məhv etdiyini iddia edib. SEPAH-ın sözlərinə görə, bu hücum ABŞ-ın cümə axşamı gecəyarısı Sirikdəki rabitə qülləsinə endirdiyi hava zərbəsinin cavabı olub. SEPAH həmçinin hücumlar təkrarlanacağı təqdirdə qurumun Hava-Kosmik Qüvvələrinin «sərhədsiz» cavab verməyə hazır olduğunu bildirərək hədələyib.
CENTCOM SEPAH-ın iddiasını təkzib edib. Komandanlığın açıqlamasına görə, Bəhreynə doğru atılan hər iki kamikadze PUA zərərsizləşdirilərək məhv edilib, hücum nəticəsində heç bir insan itkisi və ya maddi ziyan qeydə alınmayıb.
