İslam Respublikası ABŞ-ın İrana qarşı əməliyyatlarına dəniz, hərbi və ya logistik yardım göstərən istənilən ölkənin müharibə tərəfi sayılacağı ilə hədələyib. Xarici İşlər Nazirliyinin sözçüsü İsmayıl Bəqayi cümə axşamı bu xəbərdarlığı X sosial şəbəkəsində ingilis dilində yaydığı paylaşımda edib və orada bir Koreya atalar sözünə yer verib.
Bəqayi istənilən birbaşa və ya dolayı iştirakı, hətta ABŞ-ın iqtisadi təzyiqinə qoşulmağı belə «düşmənçilik xarakterli və qeyri-qanuni əməl» adlandırıb. O, Cənubi Koreyanın adını çəkmədən «gəmiçilik azadlığının qorunması» və ya «dəniz quldurluğuna qarşı mübarizə» kimi adların bu əməkdaşlığın mahiyyətini dəyişmədiyini və nəticələrə görə məsuliyyətin iştirakçı ölkələrin üzərinə düşdüyünü iddia edib.
Cənubi Koreyanın Nazirlər Kabineti iki gün əvvəl dəniz quldurluğuna qarşı mübarizə aparan Çeonqhe bölməsinin missiyasının Oman sularına qədər genişləndirilməsi planını təsdiqləyib. Planın icrası parlamentin təsdiqini tələb edir. Seul bu missiyanın qeyri-döyüş xarakterli olduğunu və Cənubi Koreyanı ABŞ ilə İran arasındakı müharibəyə cəlb etməyəcəyini bildirir.
