İrəvandakı tarixi Göy məsciddə «mədəni tədbir» adı altında keçirilən proqram Qafqaz Müsəlmanları İdarəsinin sərt reaksiyasına səbəb olub. Bakıda yerləşən bu dini qurum noyabrın 11-də, çərşənbə günü Azərbaycan Respublikasının müsəlmanları adından yaydığı bəyanatda həmin tədbiri İslam dəyərləri və ayinləri ilə bir araya sığmayan hadisə adlandırıb və kəskin şəkildə pisləyib.
Qafqaz Müsəlmanları İdarəsi bu proqramı «qeyri-mədəni şou» kimi dəyərləndirib və Ermənistan hökumətindən bu kimi halların təkrarlanmasının qarşısını almağı tələb edib. Göy məscid 18-ci əsrdə, İrəvan xanlığı dövründə inşa edilib.
Bəyanatda Ermənistanın 2020-ci ildə 44 günlük müharibədə kapitulyasiya etdiyi xatırladılaraq, İrəvanın sülh danışıqlarına sadiq olduğunu bəyan etdiyi bir şəraitdə belə bir tədbirin keçirilməsinin sülh prosesinə şübhə yaratdığı bildirilib. Qurumun vurğuladığına görə, bu cür hadisə yalnız revanşist qüvvələrin xeyrinədir.
