Rusiyanın rəhbərlik etdiyi Kollektiv Təhlükəsizlik Müqaviləsi Təşkilatı (KTMT) Moskvada keçirilən zirvə toplantısında Ermənistanı bütün qurumlarında səsvermə hüququndan məhrum edib. İrəvan bu hərbi ittifaqın yüksək vəzifələrinə namizəd irəli sürmək hüququnu da itirib.
Kremlin sözçüsü Dmitri Peskov noyabrın 11-də, çərşənbə günü bu qərarın səbəbinin Ermənistanın öhdəliklərini yerinə yetirməməsi olduğunu açıqlayıb. İrəvan 2024-cü ilin fevralından bu təşkilatda iştirakını dondurub və həmin ildən üzvlük haqqını ödəmir. Nizamnaməyə əsasən, borcunu iki ildən artıq müddətdə ödəməyən üzv səsvermə hüququndan məhrum edilə bilər.
Ermənistan rəsmi olaraq təşkilatdan çıxarılmayıb. Rusiyanın xarici işlər naziri Sergey Lavrov Ermənistanın kollektiv təhlükəsizlikdən yararlanmaq hüququnun qüvvədə qaldığını deyib. Ermənistanın baş naziri Nikol Paşinyan daha əvvəl ölkəsinin bu təşkilatdakı maraqlarının sona çatdığını və geri qayıtmaq niyyətində olmadığını bildirmişdi.
