İsraildə keçirilən parlament seçkilərində seçki qutularının 72 faizindən çoxu sayıldıqdan sonra Benyamin Netanyahunun koalisiyası hələ də öndədir, lakin hökumət qurmaq üçün zəruri olan çoxluğu əldə edə bilməyib.
"The Times of Israel" nəşrinin Mərkəzi Seçki Komitəsinin məlumatlarına istinadən verdiyi xəbərə görə, 28 oktyabr, çərşənbə səhərinə olan vəziyyətə əsasən, parlamentdəki 120 yerdən 54-ü Netanyahunun koalisiyasına, 48-i Qadi Ayzenkotun rəhbərlik etdiyi müxalifət koalisiyasına, 18-i isə ərəb partiyalarına məxsusdur.
Bu ilkin nəticələrə əsasən, Netanyahunun 61 yerlik çoxluğa çatması üçün hələ 7 yer çatmır və ərəb partiyaları hökumətin formalaşdırılması ilə bağlı hesablamalarda həlledici rol oynaya bilər.
Səslərin sayılması davam edir və yekun nəticə hələ bəlli deyil. Çıxılmaz vəziyyət davam edərsə, İsrail koalisiyanın qurulması üzrə çətin danışıqlarla və ya təkrar seçkilərin keçirilməsi ehtimalı ilə üz-üzə qalacaq.
