Bir əfqan mənbəyinin yaydığı kəşfiyyat qiymətləndirmələrinə görə, bir neçə xarici silahlı qrup təlim keçmiş qüvvələri Sistan və Bəlucistana göndərməyi planlaşdırır. Bu qüvvələr bir neçə ölkədə döyüşüb. Onların əyalətin bəzi hissələrində ağır hücumlar həyata keçirməsi nəzərdə tutulur.
Tacikistan Ənsarullah Camaatının lideri Mövləvi İbrahim Tacik bu planı Şərqi Türküstan İslam Hərəkatının lideri Mövləvi Əbdülhəqlə birlikdə həyata keçirir. Həmin qiymətləndirmələrdəki iddiaya görə, onlar bu işdə Ceyşül-Ədl, Əl-Furqan və Xalq Mübarizləri Cəbhəsi ilə əməkdaşlıq edirlər. Bu qüvvələrə Mövləvi Cümə adlı şəxs komandanlıq edir.
Qiymətləndirmələrdə qeyd olunur ki, Sistan və Bəlucistandakı obyektlər və magistral yollar bir neçə həftə ərzində İslam Respublikasının silahlı müxaliflərinin əlinə keçə bilər. Həmin mənbənin sözlərinə görə, minlərlə xarici döyüşçünün Əfqanıstanın şimalında yerini dəyişməsi İran, Tacikistan, Özbəkistan və Çin üçün təhdid yaradır.
