İsrailin baş naziri Benyamin Netanyahu 7 oktyabr hücumlarında və ondan sonrakı müharibədə həlak olan qurbanların və hərbçilərin xatirəsinə həsr olunmuş dövlət anım mərasimində İslam Respublikasına yeni xəbərdarlıq edib. O, İsrailin Tehranın bu ölkənin mövcudluğunu təhdid etməsinə imkan verməyəcəyini bildirib.
Netanyahu mərasimdə İslam Respublikasının «yarandığı gündən bəri heç vaxt olmadığı qədər zəif» olduğunu iddia edib və rejimin hazırda öz varlığını qorumaq üçün döyüşdüyünü deyib. O, həmçinin İran hakimiyyətinin sonda aradan qalxacağını qeyd edib.
Mərasimdə İsrail prezidenti İsaak Herzoq, Netanyahu, müdafiə naziri İsrail Kats və ölkənin digər yüksək vəzifəli şəxsləri iştirak ediblər. Netanyahu həmçinin İsrailin təhlükəsizlik təhdidlərinə qarşı əməliyyatlarını davam etdirəcəyini vurğulayıb.
