Yəmən Rəyasət Rəhbərlik Şurasının sədri Rəşad əl-Əlimi xəbərdarlıq edib ki, İran İslam Respublikasının dəstəklədiyi husilərin Bab əl-Məndəb boğazına doğru irəliləmək cəhdləri dövlət qüvvələrinin sərt cavabı ilə qarşılaşacaq.
Yəmənin rəsmi "Səba" xəbər agentliyi əl-Əliminin ofisinə istinadən bildirib ki, Rəhbərlik Şurası Təiz cəbhələrindəki hərbi əməliyyatları və sahədəki inkişafları daim izləyir. Əl-Əlimi husiləri, o cümlədən yüzlərlə ailənin köçkün düşməsi də daxil olmaqla, münaqişənin kəskinləşməsinin insani nəticələrinə görə məsul bilib.
O, həmçinin bildirib ki, Yəmən hökuməti "İran rejiminin Bab əl-Məndəb boğazına nəzarət etmək məqsədinin" həyata keçirilməsinə icazə verməyəcək və vurğulayıb ki, husilərin bu bölgədəki hər hansı macərapərəstliyi bu qrup üçün "ağır və uzunmüddətli sürtünməyə" çevriləcək.
