İranın fəhlə təbəqəsinin alıcılıq qabiliyyəti son on ildə kəskin şəkildə aşağı düşüb və əməkhaqqının baza məbləğinin dollar qarşılığı 1395-ci ilə (2016/2017) uyğun 232 dollardan 1405-ci ildə (2026/2027) cəmi 83 dollara enib.
İLNA agentliyinə istinadən bildirilir ki, bu ilin baza əməkhaqqı 16 milyon 625 min tümən müəyyən edilib ki, bu da təxminən 200 min tümənlik dollar məzənnəsi ilə yalnız 83 dollara bərabərdir. Bir övladı olan evli fəhlənin minimum gəliri isə təxminən 124 dollar səviyyəsində qiymətləndirilir.
1395-ci ildə baza əməkhaqqının dəyəri təxminən 232 dollar, 1400-cü ildə (2021/2022) isə təxminən 99 dollar olub. Bu rəqəmlər İranda işçi qüvvəsinin gəlirinin dəyərsizləşməsinin dərinliyini göstərir.
Təqaüdçülərin həmkarlar ittifaqı fəalı Yədollah Fərəci bildirir ki, bu illər ərzində bir çox fəhlə ailələri orta təbəqədən "mütləq yoxsulluğa" düşüb və bəzi fəhlə və təqaüdçülər aylarla ət almaq imkanına malik deyillər.
Bu məişət tənəzzülü elə bir şəraitdə davam edir ki, valyuta məzənnəsinin kəskin artması və inflyasiya əməkhaqlarının nominal artımının böyük hissəsini praktiki olaraq təsirsiz edib.
