ABŞ İran rejiminin Hörmüz boğazında gəmilərin keçidinə nəzarət etmək üçün yaratdığı yeni qurumu sanksiya siyahısına daxil edib. Bu addım dünyanın ən mühüm su yollarından birinin idarə olunması ilə bağlı gərginliyin artdığını göstərir.
ArazNews-un məlumatına görə, ABŞ Maliyyə Nazirliyi İran rejiminin yaratdığı “Körfəz Su Yolu İdarəsi” adlı qurumun sanksiyaya məruz qaldığını açıqlayıb.
Vaşinqton bu qurumun Sepah-la əlaqəli olduğunu iddia edib və İran rejiminin “gəmilərdən pul tələb etməklə” regional fəaliyyətləri üçün gəlir əldə etməyə çalışdığını bildirib. ABŞ həmçinin xəbərdarlıq edib ki, bu təşkilatla əməkdaşlıq edən hər hansı şirkət və ya qurum da sanksiya ilə üzləşə bilər.
İran rejimi Hörmüz böhranının dərinləşməsi və gəmi hərəkətinin məhdudlaşmasından sonra bu yeni strukturu gəmilərin keçidini koordinasiya etmək üçün yaradıb və yaxın vaxtlarda boğazın bir hissəsini “nəzarət zonası” elan etmişdi. Bu addım ABŞ-ın sərt reaksiyasına səbəb olub.
