Fox News-da yayımlanan təhlildə bildirilir ki, son hadisələr göstərib, İran rejiminin hərbi strukturuna ağır zərbələr endirilsə belə, Tehranın tam geri çəkilməyə və ya strateji davranışını dəyişməyə məcbur edilməsi hərbi infrastrukturun məhv edilməsindən daha mürəkkəb və daha baha başa gələn prosesdir.
ArazNews-un məlumatına görə, təhlil müəllifi hesab edir ki, Ukraynadan İrana qədər müasir müharibələr göstərib, ağır təzyiq altında olan rejimlər belə ucuz vasitələrlə — pilotsuz uçuş aparatları, aşındırıcı müharibə və regional infrastruktur təhdidləri ilə böyük güclərə ciddi xərclər yükləyə bilir.
Təhlildə qeyd olunur ki, ABŞ və İsrail İran rejiminin hərbi infrastrukturu, komanda idarəetmə sistemi və əməliyyat imkanlarına ciddi zərbələr endirsələr də, növbəti mərhələdə tam məğlubiyyətin qəbul etdirilməsi ilkin hərbi uğurlardan daha baha başa gələn reaksiyalar doğura bilər.
Məqalədə vurğulanır ki, müharibənin tənliyi dəyişib və artıq ucuz, assimetrik vasitələr bahalı hava müdafiə sistemlərini tükəndirə bilir. Təhlilin yekun nəticəsinə görə, gələcəyin müharibələri mütləq rejimlərin sürətli süqutu ilə bitməyəcək və ciddi zəiflədilmiş rejimlər belə bölgəni qeyri-sabit saxlamağa davam edə biləcək.
