İran müharibəsi ilə bağlı fikir ayrılıqları NATO alyansının gələcəyini ciddi suallar altına qoyub.

ArazNews-un Reuters-ə istinadən verdiyi məlumata görə, Donald Trampın reaksiyaları və İranla bağlı müharibə NATO-nu tarixinin ən dərin böhranlarından birinə daxil edib və ABŞ-ın bu alyansa sadiqliyi ilə bağlı şübhələri artırıb.

Tramp Avropa ölkələrinin Hörmüz boğazının açılması məsələsində ABŞ-la həmrəy olmamasından narazı olduğunu bildirərək NATO-dan çıxma ehtimalını nəzərdən keçirdiyini deyib və Reuters-ə açıqlamasında “Mənim yerimdə olsaydınız, siz də belə etməzdinizmi?” ifadəsini işlədib.

Analitiklər və diplomatlar xəbərdarlıq edir ki, rəsmi çıxış olmasa belə, ABŞ-ın müttəfiqlərini müdafiə etməkdən imtina etməsi NATO-nun əsas dayağını faktiki olaraq zəiflədə bilər.

Avropa mənbələrinə görə, alyansın əsasını təşkil edən “kollektiv müdafiə” prinsipi ciddi şəkildə zədələnib və NATO qurulduğu vaxtdan bəri ən zəif vəziyyətindədir.

Bəzi Avropa rəsmiləri artıq “ABŞ-sız NATO” ssenarisinin də nəzərdən keçirilməli olduğunu bildirir. Fransanın sabiq hərbi rəsmilərindən biri bu barədə deyib: “NATO hələ də vacibdir, amma ABŞ-sız da düşünməyi bacarmalıyıq.”

Bu gərginliklər İran müharibəsi, Rusiya ilə bağlı fikir ayrılıqları və enerji məsələləri fonunda transatlantik münasibətlərin daha da kövrəkləşdiyi bir dövrdə baş verir və 76 illik alyansın gələcəyini qeyri-müəyyən edir.