Hörmüz boğazından neft tankerlərinin keçidində yaranan problemlər və İslam Respublikasının müharibəsinin fəsadları fonunda İraq neft ixracını Suriya üzərindən quru yolu ilə bərpa edib. Bu marşrutdan onilliklər boyu məhdud şəkildə istifadə olunub.
Reuters agentliyinin xəbərinə görə, Qətərin «UCC» şirkəti İraq neftini yüzlərlə yük maşını ilə Bəsrədən Suriyanın Baniyas limanına daşıyır. Gündəlik daşınan neftin həcmi 120-150 min barel təşkil edir.
İraq nefti Baniyas limanına çatdıqdan sonra Aralıq dənizi ilə müxtəlif ölkələrin neft emalı zavodlarına ixrac olunur. Bu ölkələr arasında Türkiyə, İtaliya və Yunanıstan da var.
Məlumata görə, oktyabrın sonlarından bu günədək bu marşrutla təxminən 1,6 milyon barel neft daşınıb. Üç ay ərzində ixracın 14 milyon barelə çatdırılması planlaşdırılır.
Bu marşrutun bərpası göstərir ki, Hörmüz boğazında gəmiçilik təhlükəsizliyi ilə bağlı böhran region ölkələrini enerji ixracı üçün alternativ yollar axtarmağa vadar edib.
