Fransa rəsmiləri İslam İnqilabı Keşikçiləri Korpusunun (SEPAH) üç kiber komandirinin adlarını və fotolarını yayaraq İslam Respublikasını ölkədəki yüzlərlə mağazanın soyutma sistemlərinə qarşı genişmiqyaslı hücumlara görə məsuliyyət daşıyan tərəf kimi göstəriblər. Bu hücumlar ağır maddi ziyana və ən azı 15 yanğın hadisəsinə səbəb olub.
Fransanın Kiberböhranların Koordinasiya Mərkəzinin məlumatına görə, oktyabrın 11-də və 12-də həyata keçirilən bu hücumlar təxminən 700 ticarət mərkəzinin soyuducularının və soyutma avadanlıqlarının idarəetmə sistemlərini hədəfə alıb.
Fransa rəsmiləri SEPAH-ın Elektron və Kiber Müharibə Mərkəzinin yüksək rütbəli komandirlərindən Həmidrza Ləşkəriyanı, həmçinin «Kavə» bölməsinin komandirləri Mehdi Ləşkəriyan və Rza Salarfəndi bu əməliyyatla əlaqəli şəxslər kimi açıqlayıblar.
Rəsmi hesabata əsasən, SEPAH-a bağlı «Şuştəri» bölməsi də daha əvvəl «Charlie Hebdo» jurnalına və Paris Olimpiadası ilə bağlı hədəflərə qarşı törədilən kiberhücumlarda iştirak edib.
Paris prokurorluğu məhkəmə araşdırmasına başlayıb və şübhəlilər barəsində beynəlxalq həbs qərarının çıxarılmasını tələb edib. Fransa həmçinin İslam Respublikasının səfirini çağırıb və bu hücumların icraçılarına qarşı Avropa sanksiyalarının tətbiqi istiqamətində addımlar atacağını bildirib.
