Türkiyə Prezidenti Rəcəb Tayyib Ərdoğan Ankaranın Kipr məsələsindəki mövqeyinin tamamilə aydın olduğunu bildirib. Onun sözlərinə görə, bu adada iki ayrı xalqın və iki ayrı dövlətin mövcudluğunun reallıq kimi qəbul edilməsinin vaxtı çatıb.
Ərdoğan bütün ölkələri, xüsusilə dost və qardaş ölkələri Şimali Kipr Türk Respublikasını tanımağa çağırıb. O, bu ölkələrdən adada davamlı sülhə töhfə vermək üçün həmin respublika ilə siyasi, diplomatik və iqtisadi əlaqələr qurmağı istəyib.
Türkiyə Prezidenti Ankaranın Kipr türklərini heç vaxt tək və köməksiz qoymayacağını vurğulayıb. O deyib: «Bütün dünya bunu bilməli və yadda saxlamalıdır. Kipr məsələsi bizim üçün sadəcə xarici siyasət məsələsi deyil».
