İsrailin Walla saytının məlumatına görə, Qəzza zolağına «Çoxmillətli Sabitlik Qüvvəsi»nin daxil olması üçün hazırlıq görülür. İsrailin təhlükəsizlik mənbələri nəşrə bildiriblər ki, bu qüvvənin tərkibində ABŞ hərbçiləri və digər ölkələrdən olan zabitlər var. Qüvvənin Qəzza sərhədləri yaxınlığında yerləşdirilməsi nəzərdə tutulur.
Həmin mənbələrin sözlərinə görə, son iki həftə ərzində xarici zabitlər ABŞ hərbçiləri ilə birlikdə Qəzza sərhədi yaxınlığında görülüb. Bu fəallıq qüvvənin Qəzza zolağının dərinliklərinə daxil olmasına hazırlığın bir hissəsidir.
İsrail təxminən 250 xarici əsgərdən ibarət ilkin qüvvənin daxil olmasına razılıq verib. Bu razılıqdan sonra İsrailin cənubundakı hərbi bazalardan biri ABŞ-ın nəzarəti altında olan çox möhkəmləndirilmiş obyektə çevrilib. Axios daha əvvəl xəbər vermişdi ki, Tramp Netanyahudan İsraildəki seçkilər səbəbindən aylarla dayanmış Qəzza sülh planını irəli aparmağı istəyib.
