Müharibənin səkkizinci ayında İranda iqtisadi böhran narahatlıq doğuran mərhələyə çatıb. Qiymətlərin başgicəlləndirici artımı, rialın dəyərinin çökməsi və işsizliyin genişlənməsi milyonlarla vətəndaşı həyatın ən elementar ehtiyaclarını ödəmək üçün ağır təzyiq altında qoyub.
Reuters agentliyinin məlumatına görə, rəsmi statistikaya əsasən, sentyabrda istehlak mallarının qiymətləri ötən illə müqayisədə təxminən 90 faiz artıb. İllik inflyasiya 73,6 faizə, ərzaq məhsulları və içkilərin bahalaşması isə 121,8 faizə çatıb.
Reuters xəbər verir ki, müharibə, sanksiyalar, limanların blokadası və iqtisadiyyatın səriştəsiz idarə olunması ailələrin gəlirlərini kəskin şəkildə azaldıb. Orta aylıq əmək haqqı təxminən 92 dollar təşkil edir, halbuki üç nəfərlik fəhlə ailəsinin minimum yaşayış xərci təxminən 336 dollar qiymətləndirilir.
Məşhəddə yaşayan 47 yaşlı dükançı Məhəmmədəli Reuters agentliyinə deyib: «Nə pulumuz var, nə gələcəyimiz, nə də ümidimiz. Qorxu içində yaşamaqdan yorulmuşuq.»
Bu böhran milyonlarla vətəndaşın həyatına təsir göstərir. İslam Respublikasının rəsmiləri isə hələ də iqtisadi müqavimətə vurğu edirlər. Lakin insanlar ərzaq, mənzil, müalicə və təhsil ehtiyaclarını qarşılamaqda getdikcə artan çətinliklərlə üzləşirlər.
