Türk dünyası ölkələrinin kinematoqrafçılarının iştirakı ilə 6-cı «Qorqud Ata» Beynəlxalq Film Festivalı noyabrın 3-dən 7-dək İstanbulda keçiriləcək. Bu mədəni tədbir beş il sonra yenidən doğulduğu yerə qayıdır.
Türkiyə Mədəniyyət və Turizm Nazirliyinin məlumatına görə, festivalda 56 film pulsuz nümayiş olunacaq. Tammetrajlı, sənədli və qısametrajlı filmlər olmaqla üç kateqoriyada isə 30 əsər mükafatlar uğrunda yarışacaq.
Tədbir 150-dən çox beynəlxalq qonağı və Türkiyə kino sənayesindən 300 nümayəndəni bir araya gətirəcək. Festival məşhur qırğız yazıçısı Çingiz Aytmatovun həyatından bəhs edən «Aytmatov» filminin nümayişi ilə açılacaq.
Bundan əlavə, Türk dünyası kinosu toplantısı, akademik konfrans və birgə kino proqramları keçiriləcək. Türkiyə və Qırğızıstanın seçilmiş dörd kino layihəsi isə maliyyə dəstəyi alacaq.
«Qorqud Ata» festivalı mədəni bağları möhkəmləndirmək, kino sahəsində əməkdaşlığı genişləndirmək, həmçinin türk xalqlarının ortaq tarixini və rəvayətlərini tanıtmaq məqsədilə keçirilir.
