Reuters regional mənbələrə istinadən xəbər verib ki, Yəmənin Husi hərəkatı Qırmızı dənizin cənubundan və Bab əl-Məndəb boğazından keçən ticarət gəmilərindən rüsum alınmasını nəzərdən keçirir. Bu addım qrupun Səudiyyə Ərəbistanına dəniz blokadası elan etməsindən sonra gündəmə gəlib.
Məlumata görə, əksər gəmilər rüsuma cəlb ediləcək, lakin Çin gəmiləri çox güman ki, bu ödənişdən azad olacaq. İki məlumatlı mənbə bildirib ki, Husi nümayəndə heyətinin son Tehran səfəri zamanı İslam Respublikasının məmurları onlarla Bab əl-Məndəbdən rüsum alınması məsələsini müzakirə edib. Layihənin məqsədi beynəlxalq su yollarından ödəniş alınmasını normallaşdırmaq və ABŞ üzərindəki təzyiqi artırmaq kimi təqdim edilib.
Belə bir planın həyata keçirilməsi Səudiyyə Ərəbistanının Qırmızı dəniz üzərindən neft ixracı üçün alternativ marşrutunu ciddi təhlükə altına ala bilər. Bab əl-Məndəbin bağlanması və ya təhlükəsizliyinin pozulması enerji çatışmazlığına dair narahatlıqları artıracaq və dünya miqyasında nəqliyyat xərclərinin yüksəlməsinə səbəb olacaq.
