İsrailin baş naziri Benyamin Netanyahu ölkəsinin hücumlarla İranın nüvə və raket proqramını “dağıtdığını” iddia edib.

ArazNews-un məlumatına görə, The Times of Israel-ə istinadən Netanyahu bildirib ki, İsrail fevral ayında hücum qərarı verib, çünki İran “nüvə silahına çox yaxın idi” və raket gücünü geniş şəkildə artırmaq üzrə idi.

O iddia edib ki, əgər İsrail son bir ildə iki dəfə İrana hücum etməsəydi, bu ölkə “artıq nüvə silahına sahib olardı”. Netanyahu həmçinin onların əldə etdiyi məlumatların Tehranın zənginləşdirilmiş uranı silaha çevirməyə çalışdığını göstərdiyini deyib.

İsrailin baş naziri əlavə edib ki, “Roaring Lion” əməliyyatı çərçivəsində səkkiz nüvə alimi öldürülüb və Arak ağır su reaktoru, sentrifuqa istehsal xətləri və uran obyektləri daxil olmaqla mühüm infrastruktur hədəf alınıb.

O sonda vurğulayıb: “Biz onların nüvə və raket proqramını dağıtmağa nail olduq.”