Jerusalem Post-un iki məlumatlı mənbəyə istinadən yazdığına görə, ABŞ və İsrail İranda strateji hədəflərin geniş siyahısını yekunlaşdırıb və Vaşinqtonla Tehran arasında müharibənin dayandırılması və Hörmüz boğazının açılması ilə bağlı razılaşma əldə olunmasa, Donald Trampın razılığı ilə bu hədəflərə zərbələr endiriləcək.

Məlumata görə, bu siyahı İran rejiminin Trampın tələblərinə qarşı çıxmasının davam etməsi fonunda yüksək səviyyəli intensiv danışıqlar nəticəsində hazırlanıb. Hesabatda həmçinin ABŞ və İsrail orduları arasında əməliyyat koordinasiyasının da tamamlandığı bildirilir.

Son əməliyyat koordinasiyası ötən cümə axşamı İsrail Baş Qərargah rəisi Eyal Zamirin ABŞ Mərkəzi Komandanlığı (CENTCOM) rəhbərliyi ilə görüşündə həyata keçirilib. Görüşdə tərəflər missiyanın məqsədləri və rolların bölüşdürülməsi ilə bağlı qərarlar qəbul edib.

ABŞ prezidenti Donald Tramp bazar günü Truth Social platformasında bildirib ki, əgər İran rejimi ABŞ şərq vaxtı ilə çərşənbə axşamı axşamına qədər razılaşmaya gəlməsə, İranın elektrik stansiyaları və körpüləri hədəf alınacaq.