ABŞ prezidenti Donald Tramp hərbi əməliyyatların yaxın zamanda başa çata biləcəyini bildirib və deyib ki, müharibənin sonu razılaşmadan asılı deyil.

Tramp Ağ Evdə jurnalistlərə açıqlamasında ABŞ-ın İranla bağlı hərbi əməliyyatları qarşıdakı 2–3 həftə ərzində dayandıra biləcəyini deyib.

O bildirib: “Çox tez çıxacağıq… bəlkə iki həftə, bəlkə üç həftə.”

Tramp vurğulayıb ki, müharibənin başa çatması mütləq Tehranla razılaşmaya bağlı deyil və əlavə edib: “İran bizimlə razılaşmaq məcburiyyətində deyil.”

Eyni zamanda o qeyd edib ki, əməliyyatların dayandırılması üçün əsas şərt İranın qısa müddətdə nüvə silahı əldə etmək imkanını itirməsidir.

Bu arada ABŞ müdafiə naziri qarşıdakı günləri “həlledici” adlandırıb.

Eyni zamanda, İranın ABŞ-ın 15 bəndlik təklifinə hələ cavab vermədiyi və ölkə daxilində bu məsələ ilə bağlı fikir ayrılıqlarının olduğu bildirilir.

Digər tərəfdən, ABŞ dövlət katibi Marko Rubio da Vaşinqtonun müharibədə “finiş xəttini” gördüyünü və İranla mesaj mübadiləsinin davam etdiyini açıqlayıb.