İsmayıl Hadi, hüquqçu, dilçi və tanınmış türk yazarı, həmçinin “Varlıq” dərgisinin müəlliflərindən biri, 69 yaşında vəfat edib; bu xəbər Azərbaycan ədəbi və mədəni ictimaiyyətini dərin kədərə qərq edib.

ArazNews-un “Varlıq” dərgisinin Instagram səhifəsinə istinadən verdiyi məlumata görə, 1957-ci ildə anadan olmuş bu görkəmli şəxs peşə fəaliyyəti boyunca yazıçı, tədqiqatçı və hüquqçu kimi tanınıb və türk dili və ədəbiyyatı sahəsində çoxsaylı əsərlər qələmə alıb.

Onun əsərləri arasında “Türkcə sənətdir, farsca şəkər” kitabı, “Dil dəniz” etimoloji lüğəti, “Balaş” ssenarisi, eləcə də bir neçə roman və hekayə toplusu yer alır. Hadi satirik yazılarında “Kənd uşağı” təxəllüsündən istifadə edib və bu sahədə də diqqətçəkən əsərlər ortaya qoyub. “Varlıq” dərgisinin məsul redaktoru da yaydığı mesajda onun vəfatı münasibətilə ailəsinə, Azərbaycan ədəbi ictimaiyyətinə və türk dili sevərlərə başsağlığı verib.

Dr. Məhəmməd Rza Heyətin mesajı:

Varlıq dərgisinin yazarlarından, böyük hüquqçu və dilçi alim, roman, hekayə və ssenari yazarı İsmayıl Hadi’nin (1957–2026) qəfil vəfat xəbəri dərgimizin yazarlarını və ədəbiyyatsevərlərimizi dərindən kədərləndirdi. Elmi və ədəbi fəaliyyətləri ilə yanaşı, yardımsevərliyi və yüksək milli düşüncəsi ilə də tanınan İsmayıl Hadi “Türkcə sənətdir, farsca şəkər” adlı dilbilgisi kitabının, “Dil dəniz” adlı etimoloji sözlüyün, “Balaş” adlı ssenarinin və bir neçə roman və hekayənin müəllifidir.

Satirik yazılarında “Kənd uşağı” təxəllüsünü işlədən İsmayıl Hadi’nin türk dili və ədəbiyyatı üzərindəki xidmətləri yüksək qiymətə layiqdir. Onun vəfatı ilə Azərbaycan dəyərli bir türkoloq alim və yazıçısını itirmişdir. Bu böyük itkini başda ailəsi olmaqla bütün Azərbaycan türklərinə, türk dünyasına və türkoloqlar camiəsinə başsağlığı verir, mərhuma Ulu Tanrıdan rəhmət diləyirik.

Varlıq dərgisi Yayın Kurulu adına

Dr. Məhəmməd Rza Heyət