آراز نیوز

ارگان خبری تشکیلات مقاومت ملی آزربایجان

دیرنیش
سه شنبه ۲۹ام اسفند ۱۴۰۲
شما اینجا هستید: / تورکجه / بختیار واهاب‌زاده: منیم آنا دیلیم

بختیار واهاب‌زاده: منیم آنا دیلیم

بختیار واهاب‌زاده: منیم آنا دیلیم
3 مارس 2021 - 17:13
کد خبر: ۵۸۴۷۲
تحریریه آرازنیوز

بختیار واهاب‌زاده (۱۹۲۵-۲۰۰۹)

——-

منیم آنا دیلیم منیم کیملییم،
پاسپورتوم، اؤزومه اؤز حاکیملییم،

منیم منلییمین فوسونکارلیغی
دانیشان کمالی، آغلی‌دیر دیلیم.
میللتین وارلیغی، یوردون وارلیغی
سنین وارلیغینا باغلی‌دیر، دیلیم.

منی هم باباملا، هم ده نوه‌مله،
باغلاییب اوزانان تاریخ باغیم‌سان.
دونه‌نیم، صاباحیم اوسته‌لیک هله،
منیم اؤز هونریم، سس بایراغیم‌سان.

سن‌سیز آدیم حرام، وطنیم حرام
آنا سودو کیمی حالالیم دیلیم.
هاردا سن وارسان‌سا، اوردا من وارام،
ائی منیم اولدوزوم، حیلالیم دیلیم.

داشلاردان سوزولدون سن زامان-زامان
گؤزل‌دیر سولارین داش‌دان کئچمه‌سی.
یاران‌دی دوم-دورو دامجیلارین‌دان
بایاتی چئشمه‌سی داستان چئشمه‌سی.

منیم آنا دیلیم، معجزه‌م، سحریم،
چپرلر داغیدار، قاپیلار قیرار.
بزه‌ن بیرجه کلمه ان درین فیکرین
اوستونه نور سالیب جیلالاندیرار.

فرقینی بیلمه‌ییب آغلا قارانین،
آدام وار بو دیلی یاد سایار بو گون.
دده‌سی بو دیل‌ده جبهه یارانین،
اؤزو اوؤزگه دیل‌ده بانلایار بو گون.

هانسینی سؤیلییم، میس‌می، دمیرمی،
یالنیز اؤز سسیله جینگیلدمیرمی؟
میس سسی بنزمز دمیر سسینه
اونلارین دیلی‌دیر اونلارین سسی.
بنزمز بولبولون ترانه‌سینه
قارغا قاریلتی‌سی، هوپ-هوپ نغمه‌سی.

نه یارپاق، نه کولک، نه مئتال، نه قوش
سس‌لنمیر، اوخومور اؤزگه دیلین‌ده.
بس سنه نه دوشوب، آی دیلی یانمیش،
یاد دیل‌ده اؤتورسه‌ن اؤز منزیلین‌ده.

ناموس‌دان بیخبر، ویجدان‌دان اوزاق،
وظیفه کورسوسو مرام‌دیر سنه.
وطنین دیلینی سئومه‌یه‌ن آلچاق،
وطنین چؤره‌یی حرام‌دیر سنه…

منیم منلییمین فوسونکارلیغی،
دانیشان کمالی، آغلی‌دیر دیلیم،
وطنین وارلیغی، خالقین وارلیغی،
سنین وارلیغینا باغلی‌دیر، دیلیم.

هیچ دیدگاهی برای این مطلب ثبت نشده است

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

این سایت از اکیسمت برای کاهش هرزنامه استفاده می کند. بیاموزید که چگونه اطلاعات دیدگاه های شما پردازش می‌شوند.

روی خط خبر