آراز نیوزون وئردیگی بیلگیلره گؤره، بؤلگهنی اۆزۆجو بحرانلار و دایمی گرگینلیکلر بورودوغو بیر واختدا، آذربایجان اؤز داخیلی ثباتی و امنیتی ایله اؤن پپلانا چیخیر. باکینین یۆرتدۆگۆ فعال خارج سیاست و قونشولارلا قوردوغو سیخ امکداشلیق، بؤیۆک اۇزونمۆدتلی پروژهلر اۆچۆن گوونلی بیر سۆرهج یارادیب.
باکی اؤتن ایللرده اولوسلارآراسی اولاشیما (ترانزیت) بؤیۆک سرمایهلر یاتیریب. بوگۆن اؤلکه، آسیا ایله اروپانی بیر-بیرینه باغلایان ان اؤنملی زنجیرلردن بیری ساییلیر.
آردی
اورتا کریدور، دوغو-باتی، قوزئی-گونئی یوللاری و اؤزللیکله زنگهزور لایحهسی، آذربایجانین بؤلگهسل تیجارتدهکی حاکم رولونو داها دا گوجلندیریر.
بو گلیشمهلرین یانیندا، قاراباغین اؤزگۆرلوگه قاووشماسی و بو بؤلگهده آپاریلان بؤیوک تیکینتی و یئنیدنقورما ایشلری، یاتیریمچیلار اوچون یئنی آلانلار آچیب.
یئنی شهرلرین سالینماسی، مدرن آلتیاپی و انرژی لایحهلری، خارج شیرکتلرین دیقتینی اؤزۆنه چکمکدهدیر.
دیگر طرفدن، آذربایجان یالنیز نفت و گازا باغلی قالماق ایستهمیر. اؤلکه اقتصادیاتینی چئشیدلندیرمک مقصدیله گونش و کۆلک کیمی یئنیلنه بیلن تمیز انرژی قایناقلارینا گئنیش یاتیریملار ائدیر و دۆنیا ایله مۆعاصیر بیر جیزگیده آددیم آتیر.
بؤلگهده سیاسی و امنیتی بلیرسیزلیکلرین حاکم اولدوغو بیر دؤورده، آذربایجان اؤز گوونلیگینه، استراتژیسینه و اقتصادی پوتانسیلینه آرخالاناراق تیجارت، ترانزیت و یاتیریمدا دۆنیانین اَن بؤیۆک مرکزلریندن بیرینه چئوریلمک اۆزرهدیر. بو دۆزگۆن و دۆشۆنۆلمۆش آددیم ایندیکی گوج و سرعتله داوام ائدرسه، باکینین اوراسیا جغرافیاسینداکی چکیسی (وزن) داها دا آغیر اولاجاقدیر.
