İran Bəlucistan Birləşmiş Cəbhəsinin birinci şəxsi Cəmşid Əmiri ArazNews radiosunun «Panorama» proqramında bildirib ki, farsdilli medianın bir hissəsi illər boyu Bəlucistanı auditoriyaya qaçaqmalçılıq və «tut-basdır» xəbərləri ilə tanıdıb. Onun sözlərinə görə, bu media işıqlandırmasında bəluc xalqının mədəniyyəti, eləcə də onların hüquqi bərabərlik və sosial ədalət tələbləri daha az əks olunub.
Əmiri deyib ki, eyni yanaşmanı İran tarixinin geniş yayılmış təqdimatlarında da görür. Onun sözlərinə görə, bu təqdimatlarda keçmiş padşahların və hakimiyyətlərin xeyrinə olanlar ön plana çıxarılıb, lakin Bəlucistanda öz xalqının hüquqları uğrunda mübarizə aparmış şəxslərin adlarına daha az rast gəlinir. O vurğulayıb ki, bütün İranda azadlıq, bərabərlik və sosial rifah da bəluc fəallarını narahat edən məsələlər sırasında olub.