Dünya bazarında neftin qiyməti noyabrın 16-da, bazar ertəsi günü, təklif artıqlığı ehtimalının artması və Yaxın Şərq neftinin Hörmüz boğazı vasitəsilə ixracının müharibədən əvvəlki səviyyəyə yaxınlaşması fonunda aşağı düşüb.
Reuters agentliyinin məlumatına görə, "Brent" markalı neftin bir barelinin qiyməti 0,6 faiz azalaraq 95 dollar 30 sentə, ABŞ xam neftinin bir barelinin qiyməti isə 0,3 faiz ucuzlaşaraq 88 dollar 34 sentə düşüb.
Beynəlxalq Enerji Agentliyi 2026-cı ilin son rübündə qlobal neft təklifinin tələbatı gündəlik təxminən 1,7 milyon barel üstələyəcəyini proqnozlaşdırıb; bu dəyişiklik bazarın təklif çatışmazlığından neft artıqlığına keçə biləcəyini göstərir.
Eyni zamanda, Çində neft emalı zavodlarının fəaliyyətinin azalması da qiymətlərə təzyiq göstərib. Açıqlanan statistikaya əsasən, oktyabr ayında bu ölkədə emal olunan neftin həcmi ötən ilin müvafiq dövrü ilə müqayisədə 8,1 faiz azalıb.
Qiymətlərin enməsinə baxmayaraq, Hörmüz boğazında tankerlərə hücum riski və dəniz daşımalarının yüksək xərcləri hələ də dünya neft bazarında qeyri-sabitliyə səbəb olan amillər sırasında qalır.