Azərbaycan Milli Məclisinin deputatı Elşad Musayevin fikrincə, İslam Respublikasının 14 İran vətəndaşının Azərbaycana girişinin qadağan edilməsinə etirazı SEPAH-ın hökumətə təzyiqinin nəticəsidir. Ekspertlər Məclisinin üzvü Möhsün Əraki və "Keyhan" qəzetinin baş redaktoru Hüseyn Şəriətmədari də Bakının "qara siyahı"sındadır.
Bakı bu qərarın səbəbi kimi təhqiramiz bəyanatları, dini ekstremizmin təbliğini və Azərbaycanın suverenliyinə qarşı addımlar atmağa çağırışları göstərib. İranın Xarici İşlər Nazirliyinin sözçüsü İsmayıl Bəqai bu qərarı "qeyri-dost addım" adlandırıb, Azərbaycanın səfiri isə Xarici İşlər Nazirliyinə çağırılıb. Tehran "arzuolunmaz şəxs" statusunun yalnız diplomatlara şamil olunduğunu iddia edir.
Musayev bildirib ki, Tehran ABŞ ilə müharibədən sonra özünü qalib sayır və qonşularına qarşı təhdidlərini artırıb. Onun sözlərinə görə, Pezeşkiyan Bakı ilə qardaşlıqdan danışır, lakin İslam Respublikası rəhbərinin müşaviri Əli Əkbər Vilayəti təhdidlər səsləndirir, SEPAH isə fars şovinizmi siyasətini irəli aparır.
