Türkiyənin aparıcı müdafiə sənayesi şirkətlərindən olan ASELSAN xarici sifarişçiyə hava hücumundan müdafiə sistemlərinin satışı üçün 1,1 milyard dollarlıq müqavilə imzalayıb. Bu, şirkətin tarixində ən böyük tək ixrac müqaviləsidir. ASELSAN Türkiyə birjasının məlumatların açıqlanması sisteminə təqdim etdiyi bildirişdə alıcı ölkənin adını, sistemlərin növünü və təhvil qrafikini açıqlamayıb.
Yeni müqavilə ASELSAN-ın 2026-cı ildə qırdığı üçüncü ixrac rekordudur. Oktyabr ayında da radar, pilotsuz uçuş aparatlarına qarşı sistem və hava hücumundan müdafiə sistemləri üzrə 442,5 milyon dollarlıq və 488,5 milyon avroluq iki müqavilə imzalanıb. Şirkətin bu il bağladığı yeni ixrac müqavilələrinin ümumi həcmi təxminən 4,3 milyard dollara çatıb.
ASELSAN-ın bu ilin ilk 9 ayındakı gəlirləri 28 faiz artaraq 151,5 milyard lirəyə çatıb, xarici satışları isə 142,5 faiz yüksəlib. Şirkətin icrası davam edən sifarişlərinin həcmi də ilk dəfə 30 milyard dolları ötüb.
