İsraillə müharibə Livan Hizbullahının maliyyə imkanlarını ciddi şəkildə zəiflətdiyi bir vaxtda, qruplaşma zərər çəkmiş ərazilərin bərpa xərclərini Livan hökumətinin üzərinə keçirməyə çalışır. Əvəzində isə bərpanın siyasi qazanclarını öz adına yazmaq istəyir.
The National Interest nəşrində dərc olunan təhlilə görə, Hizbullahın baş katibi Naim Qasim dəfələrlə vurğulayıb ki, dağıdılmış ərazilərin bərpası «Livan hökumətinin məsuliyyətidir». O, bu xərclərin ödənilməsi üçün hökumətə təzyiq göstərəcəyini də vəd edib.
Hizbullah oktyabrın 13-də didərgin düşmüş ailələrə yardım üçün yeni proqram elan edib. Proqrama əsasən, hər ailə bir il ərzində 14 min dollaradək yardım ala bilər.
Eyni zamanda, Livan hökuməti Dünya Bankının dəstəyi ilə təxminən 70 milyon dollar dəyərində infrastruktur müqavilələrini nəzərdən keçirir.
Təhlildə xəbərdarlıq edilir ki, Hizbullahın və onun siyasi müttəfiqi olan Əməl hərəkatının bələdiyyələrdə və bərpa qurumlarında nüfuzu bu iki qüvvəyə dövlət büdcəsindən maliyyələşdirilən yardımları öz adlarına çıxmaq imkanı verə bilər.
Müəllif belə nəticəyə gəlir ki, Livan hökumətinin maliyyə və icra imkanlarının gücləndirilməsi müstəqil nəzarət və vətəndaşlarla birbaşa əlaqə olmadan Hizbullahın siyasi nüfuzunun azalmasına mütləq gətirib çıxarmayacaq.
