İsrailli jurnalist Dror Blazade İslam Respublikası ilə Qətər arasında qapalı qapılar arxasında aparılan danışıqların iştirakçılarından birinə istinadən yazıb ki, heç bir irəliləyiş yoxdur. Mənbənin sözlərinə görə, Tehran bir qarış belə güzəştə getməyib. O, İslam Respublikası nümayəndə heyətinin üzvlərini ABŞ ilə razılaşma bir yana, hətta öz yeməkləri barədə belə qərar verə bilməyən şəxslər kimi xarakterizə edib.
Mənbə əlavə edib ki, hər iki tərəf işin hara gedəcəyini bilir və yeganə sual Trampın qərarının vaxtı və forması ilə bağlıdır. Onun sözlərinə görə, Tehran Hörmüz boğazı ilə bağlı müəyyən çeviklik nümayiş etdirib, lakin orada da maksimalist tələblər irəli sürür.
Axios-un müxbiri Barak Ravid ABŞ ilə İslam Respublikası arasındakı danışıqlarda iştirak edən diplomatlardan birinə istinadən bu məlumatı yanlış adlandırıb. Diplomatın sözlərinə görə, Tehran nümayəndə heyəti bazar günü səhər tezdən Dohanı tərk edib. O bildirib ki, şənbə günü aparılan danışıqlar müsbət keçib və vasitəçilər qalan fikir ayrılıqlarını azaltmağa çalışırlar.
