İslam İnqilabı Keşikçiləri Korpusunun (SEPAH) siyasi müavini Yədullah Cavani İran ilə ABŞ arasındakı qarşıdurmanın nəticələrini Birinci və İkinci Dünya müharibələri ilə müqayisə edib. O, bu münaqişənin nəticəsinin beynəlxalq nizamı və dünyadakı güc balansını dəyişə biləcəyini iddia edib.
Cavani oktyabrın 14-də, çərşənbə günü Gülüstan əyalətinin inzibati şurasının iclasında çıxış edib: "Ölkə dünya müharibəsinin ortasındadır. Bu müharibənin adı dünya müharibəsi olmasa da, dünya onun nəticələrinə dünya müharibəsi kimi baxır".
O, iki dünya müharibəsindən sonra beynəlxalq münasibətlərin dəyişdiyini xatırladıb. Cavaninin sözlərinə görə, hazırkı qarşıdurma forma və miqyas baxımından dünya müharibəsi sayılmasa da, güclərin mövqeyində oxşar dəyişikliklərə səbəb ola bilər.
SEPAH-ın siyasi müavini həmçinin Donald Trampın bu müharibədə məğlub olduğunu, lakin onun nəticələrindən narahat olduğu üçün məğlubiyyəti qəbul etmək istəmədiyini iddia edib. O, qarşıdurmanın İslam Respublikasının və İran rejiminin vəkil qruplarının xeyrinə başa çatacağını proqnozlaşdırıb.
Bu açıqlamalar ABŞ-ın yeni hücumlar edəcəyi ehtimalının hələ də müzakirə olunduğu bir vaxtda səslənib. SEPAH rəsmiləri də Hörmüz boğazı yaxınlığında Amerika hərbi gəmilərinə və ticarət gəmilərinə qarşı təhdidlərini gücləndiriblər.
