Səudiyyə Ərəbistanı strateji Şərq–Qərb neft kəmərinə pilotsuz uçuş aparatı ilə hücumdan sonra neft daşınmasında mühüm rol oynayan bu marşrutu müvəqqəti olaraq bağlayıb. Eyni zamanda, İran rejiminin dəstəklədiyi husilər Yəmən sahillərində irəliləyərək Bab-əl-Məndəbdəki strateji Meyun adası və Qırmızı dənizdə digər bölgələr üzərində nəzarəti ələ keçiriblər.
Reuters agentliyi yazıb ki, son aylarda 1200 kilometrlik Şərq–Qərb neft kəməri gündə təxminən 4-5 milyon barrel neft daşıyıb və Hörmüz boğazındakı mümkün pozuntuları dövr etmək üçün Səudiyyə Ərəbistanının əsas marşrutlarından biri olub. Səudiyyə Ərəbistanının Energetika Nazirliyi bildirib ki, bu kəmər «ehtiyat tədbiri kimi» bağlanılıb.
Riyad və Bağdad bildiriblər ki, hücum İraq ərazisindən həyata keçirilib və İraq hökuməti buna cavab olaraq bir hərbi komandiri vəzifəsindən kənarlaşdırıb, həmçinin İranla Şəlamçə keçid məntəqəsini müvəqqəti bağlayıb.
Bu arada, Yəmən hökumətinin mənbələri Reuters agentliyinə bildiriblər ki, husilər Meyun adasından əlavə, Hənişə adalarını, əl-Muxa limanını və Zubab şəhərini də ələ keçiriblər. Bu irəliləyiş dünyanın ən mühüm gəmiçilik və enerji marşrutlarından birinə təzyiqi ciddi şəkildə artıra bilər.
Reuters agentliyi həmçinin xəbər verib ki, Məhəmməd bin Salman Donald Trampdan husilərə qarşı hərbi yardım istəyib, lakin Vaşinqton hələlik birbaşa hərbi müdaxiləyə razılıq verməyib və yalnız kəşfiyyat məlumatlarının paylaşılması və hədəf müəyyənləşdirilməsinə dəstək göstərilməsini vurğulayıb.
