Reuters agentliyi xüsusi hesabatında bildirib ki, İran rejimi son illərdə sanksiyaları dolayı yolla aşmaq üçün barter formasında bir mexanizmdən istifadə edib və Çinə satılan neft müqabilində bu ölkədən milyardlarla dollarlıq mal almaq üçün lazımi kredit əldə edib.
İki yüksək rütbəli İran mənbəyi və məsələdən xəbərdar üç şəxs Reuters agentliyinə bildirib ki, son bir il ərzində xüsusi bir maliyyə mexanizmi vasitəsilə təxminən 2-2,5 milyard dollar köçürülüb. Bu mənbələr qeyd edib ki, İran bu krediti dərman, avtomobil, rabitə avadanlığı, bəzi hallarda isə hərbi avadanlıq almaq üçün istifadə edib.
Reuters həmçinin xəbər verib ki, bu mexanizmdən ən azı bir dəfə keçən il İranın hava hücumundan müdafiə sistemlərinin təchizatı ilə bağlı milyonlarla dollarlıq müqavilələr üçün istifadə olunub, baxmayaraq ki, agentlik bu əməliyyatların təfərrüatlarını müstəqil şəkildə təsdiqləyə bilməyib.
Hesabata görə, İranın neft gəlirlərinin bir hissəsi Çində fəaliyyət göstərən naməlum bir maliyyə qurumu tərəfindən idarə olunub və sonradan Çin şirkətlərinə ödənişlər, habelə İrandakı infrastruktur layihələri üçün istifadə edilib.
Çinin Xarici İşlər Nazirliyi Reuters agentliyinin sorğusuna cavabında belə bir mexanizmdən xəbərdar olmadığını bildirib və birtərəfli sanksiyalara növbəti dəfə etirazını ifadə edib. İran rejiminin nümayəndəlikləri isə Reuters agentliyinin şərh üçün müraciətinə cavab verməyib.
