Kirmanşahda yaşayan 16 yaşlı qız "Hana" başına dəyən güllə nəticəsində həyatını itirib. Onun atası bu qətlin əsas şübhəlisi hesab olunur və atəş açıldıqdan sonra hadisə yerindən qaçıb.
Rokna agentliyinin məlumatına görə, qətl Kirmanşahın Doulətabad Məskəni-Mehr məhəlləsində baş verib. Hananın anası polisə deyib ki, 6 şəhrivər (28 avqust) günü axşam, saat təxminən 18:30 radələrində, həyat yoldaşını kəmər silahı ilə qızlarının otağına doğru gedən görüb. Bir neçə an sonra atəş səsi eşidilib və ata evi tərk edib.
Ana otağa girdikdən sonra qızını qanlar içində tapıb və təcili yardıma zəng edib. Yardım qüvvələri Hananın həyatını xilas edə bilməyib.
Hananın qətli İranda son vaxtlar qeydə alınan qadın qətllərinin ən sonuncusudur. İslam Respublikası hələ də qadınlara qarşı zorakılığı cinayət hesab edən müstəqil bir qanun qəbul etməyib və bu cür işlər barədə dəqiq statistika dərc olunmur.
