Türkiyənin Müdafiə Nazirliyi cümə axşamı, şəhrivər ayının 5-də (avqustun 27-də) Suriya Demokratik Qüvvələrinin buraxılmasını və onun üzvlərinin Suriyanın dövlət qurumlarına inteqrasiyasını «mühüm dönüş nöqtəsi» kimi qiymətləndirib.
Nazirlik həftəlik brifinqində bildirib: «Bu proses Suriyanın suverenliyinin və ərazi bütövlüyünün qorunması, habelə "bir dövlət, bir ordu" yanaşmasının gücləndirilməsi baxımından əhəmiyyətlidir. Biz bu istiqamətdəki inkişafları alqışlayırıq».
Türkiyənin Müdafiə Nazirliyi həmçinin bildirib ki, ölkənin silahlı qüvvələri yaranmış müsbət prosesin bütün Suriyaya yayılması və ölkədə sabitliyin bərqərar olması üçün fəaliyyətlərini davam etdirəcək. Bəyanata görə, Ankaranın Suriya ordusunun, xüsusilə terrorla mübarizə sahəsindəki imkanlarının artırılmasına dəstəyi iki ölkə arasındakı hərbi əməkdaşlıq sazişi çərçivəsində davam edəcək.
Buraxılmış Suriya Demokratik Qüvvələrinin (QSD) komandiri Məzlum Əbdi şəhrivərin 3-də (avqustun 25-də) Dəməşqdə bildirib ki, bu qüvvələrin missiyası başa çatıb və QSD öz qüvvələrinin Suriya ordusunun bölmələrinə inteqrasiyasının tamamlanmasından sonra artıq müstəqil hərbi qüvvə kimi fəaliyyət göstərməyəcək.
