İran İslam Respublikasının Kəşfiyyat Nazirliyi açıqlayıb ki, daha əvvəl Tehranda bir neçə saat müddətinə saxlanılan iki fransız diplomat "gizli görüş" adlandırılan yerdə olarkən müəyyən edilib.
Nazirliyin bəyanatına əsasən, təhlükəsizlik əməkdaşları "xarici nüfuz və müdaxilə" adlı işlə bağlı iki şübhəlinin saxlanılması barədə hökmü icra edərkən həmin diplomatların da orada olduğunu aşkar ediblər. Kəşfiyyat Nazirliyi iddia edib ki, aşkarlanan sənədlər Fransanın İranın daxilində və xaricində əlaqə şəbəkəsi qurmaq cəhdindən xəbər verir; bu iddiaların sübutları isə hələ ictimaiyyətə açıqlanmayıb.
Bu hadisə tir ayının 28-də (iyulun 19-da) baş verib və yayılan xəbər yeni bir saxlanılma hadisəsi ilə bağlı deyil. İki diplomat bir neçə saatlıq dindirmə və şəxsiyyət müəyyənləşdirilməsindən sonra Fransa səfirliyinə təhvil verilib və sonra İranı tərk edib.
Fransanın xarici işlər naziri Jan-Nоel Barro daha əvvəl onların saxlanılmasını "əvvəlcədən planlaşdırılmış" addım və diplomatik toxunulmazlığın pozulması adlandırmışdı. Paris həmçinin açıqlayıb ki, bu diplomatlardan biri döyülüb.
