Əl-Ərəbiyyə telekanalı məlumatlı mənbələrə istinadən xəbər verib ki, ABŞ ilə İran İslam Respublikası arasında dolayı danışıqlar yekun mərhələyə daxil olub və tərəflər Hörmüz boğazı ilə bağlı 60 günlük müvəqqəti razılaşmanı müzakirə edirlər.
Məlumata görə, təklif olunan razılaşmanın məqsədi gəmiçiliyin tam bərpası və bu strateji su yolunda gərginliyin azaldılması üçün texniki danışıqlara başlanmasına şərait yaratmaq kimi qeyd olunub.
Əl-Ərəbiyyə öz mənbələrinə istinadən həmçinin bildirib ki, İran İslam Respublikasının xarici işlər naziri Abbas Əraqçi son günlərdə Pakistan ordusunun komandanı Asim Münirlə iki dəfə telefonla danışıb.
Əl-Ərəbiyyənin məlumatına əsasən, təklif olunan razılaşma çərçivəsində Hörmüz boğazına daxil olan gəmilər İran sularına daha yaxın olan marşrutdan, boğazdan çıxan gəmilər isə Oman sularına daha yaxın olan marşrutdan hərəkət edəcək. Mənbələr həmçinin vurğulayıblar ki, müzakirə olunan planda boğazdan keçən gəmilərdən rüsum alınması nəzərdə tutulmayıb.
Eyni zamanda, Pakistanın Xarici İşlər Nazirliyi Hörmüz boğazı ilə bağlı diplomatik səylərdə Omanın oynadığı rolu yüksək qiymətləndirib. Nazirliyin sözçüsü bildirib ki, Məskət bu su yolu ilə bağlı böhranın həllində mühüm rol oynayıb.
Pakistan Xarici İşlər Nazirliyinin sözçüsü həmçinin deyib ki, İslamabad Yaxın Şərqdəki hadisələr və Hörmüz boğazının vəziyyəti ilə bağlı müxtəlif ölkələrlə əlaqə saxlamaqda davam edir və əhatəli, davamlı həll yolu tapmaq üçün diplomatik səylərini davam etdirir.
