Donald Tramp ABŞ-ın raket ehtiyatlarının azalması barədə CNN-in hesabatını rədd edərək bildirib ki, Birləşmiş Ştatların böyük hərbi sursat ehtiyatları var və silah istehsalı da sürətlə davam edir.
Reuters agentliyinə istinadən, Donald Tramp ABŞ-ın sursat ehtiyatlarının təhlükəli şəkildə azalması barədə CNN-in hesabatını "yalan" adlandırıb və vurğulayıb ki, ABŞ ordusu raket və ya sursat çatışmazlığı ilə üzləşmir. O bildirib ki, silahlı qüvvələrə müxtəlif növ sursatların istehsalı və göndərilməsi eyni zamanda davam edir və ABŞ-ın müdafiə sənayesi öz istehsal gücünü genişləndirir.
Tramp həmçinin silah ehtiyatlarının vəziyyəti barədə məxfi məlumatların ifşa edilməsini "xəyanətkarlıq" adlandırıb və xəbərdarlıq edib ki, bu məlumatların yayılmasında iştirak edənlər təqib olunacaq. Daha əvvəl ABŞ-ın müdafiə naziri Pit Heqset də CNN-in hesabatını təkzib etmişdi.
