ABŞ İran nefti ilə bağlı Çin zavodu və onlarla şirkətə sanksiya tətbiq edib.

ArazNews-un Reuters-ə istinadən verdiyi məlumata görə, Vaşinqton İran nefti aldığı üçün Çində fəaliyyət göstərən müstəqil bir neft emalı zavodunu sanksiya siyahısına daxil edib.

ABŞ Maliyyə Nazirliyi bildirib ki, Dalian şəhərində yerləşən “Hengli Petrochemical” zavodu İran neftinin əsas alıcılarından biri olduğu üçün hədəfə alınıb. Bununla yanaşı, İranın “kölgə donanması” kimi xarakterizə edilən şəbəkə ilə əlaqəli təxminən 40 şirkət və gəmi də sanksiyalara məruz qalıb.

Bu addımlar İranın neft ixracını məhdudlaşdırmaq məqsədi daşıyır. ABŞ rəsmiləri qeyd ediblər ki, bu tədbirlər Tehrana iqtisadi təzyiqlərin artırılması siyasətinin bir hissəsidir.

Çin isə bu qərarı tənqid edərək, birtərəfli sanksiyaları qeyri-qanuni adlandırıb və ABŞ-dan Çin şirkətlərinə qarşı belə addımları dayandırmağı tələb edib.

Çin İran neftinin ən böyük alıcısıdır və bu ölkənin ixracının 80 faizindən çoxunu qəbul edir. Bununla belə, ekspertlər bildirirlər ki, sanksiyaların tam təsiri məhdud ola bilər və Çin banklarının hədəfə alınması daha ciddi nəticələr doğura bilər.