Böyük Britaniyanın enerji naziri Ed Miliband bildirib ki, London müttəfiqləri ilə birlikdə Hörmüz boğazının yenidən açılması üçün mümkün addımları “intensiv şəkildə” nəzərdən keçirir. Onun sözlərinə görə, İranın addımlarından sonra bu strateji marşrut faktiki olaraq bağlanıb və enerji qiymətlərinin artmasına səbəb olub.

ArazNews-un məlumatına görə, Miliband Sky News-a müsahibəsində deyib ki, Britaniya müttəfiqləri ilə birlikdə bu su yolundan gəmilərin keçidini təmin etmək üçün müxtəlif yolları müzakirə edir. O əlavə edib ki, dəniz minalarının aşkar edilməsi və zərərsizləşdirilməsi üçün avtomatlaşdırılmış avadanlıqlardan istifadə kimi variantlar da nəzərdən keçirilir, lakin planların irəliləyişi barədə əlavə detal açıqlamayıb.

Britaniyanın enerji naziri həmçinin ölkənin hərbi imkanlarının böhranlara cavab vermək üçün yetərsiz olduğu barədə iddiaları rədd edib və bildirib ki, London həm hərbi öhdəliklərini yerinə yetirməyə, həm də Hörmüz boğazı böhranına cavab verməyə qadirdir.