Peyk görüntülərinin analizi ABŞ dəniz qüvvələrinin İran yaxınlığında genişmiqyaslı yerləşdirilməsini göstərir və bunu “gücləndirilmiş çəkindirmə yerləşdirilməsi” kimi xarakterizə edir. Ekspertlərin sözlərinə görə, bu yerləşdirmə hər 24 saatda 800-dən çox döyüş uçuşu həyata keçirmək imkanını yarada bilər.

Araz News-un BBC fars bölməsinə istinadən verdiyi məlumata görə, Sentinel-2 peyk görüntüləri ABŞ-ın “Abraham Lincoln” təyyarədaşıyan gəmisinin Ərəb dənizində, İrandan təxminən 700 km məsafədə olduğunu təsdiqləyib. Bu gəmi zərbə qrupuna rəhbərlik edir və tərkibində üç raketdaşıyan esmines, təxminən 90 təyyarə və minlərlə hərbçi var.

Məlumata görə, hazırda ABŞ-ın Yaxın Şərqdə ən azı 12 döyüş gəmisi izlənir. Bunlara Arleigh Burke sinifli esmineslər, Bəhreyndə yerləşən ixtisaslaşmış gəmilər, Aralıq və Qırmızı dənizdə raketdaşıyanlar, həmçinin İordaniya və digər bazalarda yerləşdirilən çoxsaylı qırıcı və dəstək təyyarələri daxildir.

Eyni zamanda “Gerald Ford” təyyarədaşıyan gəmisinin də regiona doğru hərəkətdə olduğu və yaxın həftələrdə çatmasının gözlənildiyi bildirilir. Bu hərəkətlər Tehran və Vaşinqton arasında İsveçrədə keçiriləcək nüvə danışıqlarının ikinci raundu ərəfəsində baş verir.

Buna cavab olaraq SEPAH Hörmüz boğazında dəniz təlimləri keçirib və raket buraxılışlarının görüntüləri yayımlanıb. Hörmüz boğazı dünyanın ən mühüm enerji marşrutlarından biridir və qlobal neft və qazın təxminən beşdə biri bu yoldan daşınır.

Bəzi hərbi analitiklər hesab edir ki, ABŞ-ın hazırkı hazırlıq səviyyəsi güc nümayişindən daha artıqdır və uzunmüddətli qarşıdurmanı idarə etmək imkanını yaradır. Onların fikrincə, bu yerləşdirmə mümkün toqquşma halında İranın cavab imkanlarını zəiflətmək və geniş hava əməliyyatlarının davamlılığını təmin etmək üçün planlaşdırılıb. ABŞ rəsmiləri isə diplomatiyanın üstünlük təşkil etdiyini, lakin hərbi seçimin də masadan götürülmədiyini vurğulayır.