Bazar ertəsi, 16 fevral 2026 tarixində Təbriz Tibb Universitetinin dörd tələbəsi təhlükəsizlik qüvvələri tərəfindən saxlanıldı.

ArazNews-a daxil olan məlumatlara görə, saxlanılanlar arasında tibb tələbəsi və İslam Tələbələr Birliyinin sabiq ictimaiyyətlə əlaqələr məsulu Məhəmmədamin Sultanizadə, əczaçılıq tələbəsi və birliyin siyasi komitəsinin katibi Əli Pərvin, tibb tələbəsi və birliyin sosial komitəsinin katibi Məhəmməd Əsədi, həmçinin stomatologiya tələbəsi və birliyin üzvü Rza Məhəmmədi yer alır.

Məlumatlara görə, təhlükəsizlik qüvvələri tələbələri saxlayarkən onların şəxsi əşyalarını, o cümlədən noutbuk və mobil telefonlarını da müsadirə edib. Bu xəbərin yayımlandığı vaxta qədər saxlanılan tələbələrin harada saxlanıldığı və onlara qarşı hansı ittihamların irəli sürüldüyü barədə rəsmi qurumlar tərəfindən heç bir məlumat verilməyib.

Eyni vaxtda, saxlanılan tələbələrə dəstək və universitetdə hökm sürən təhlükəsizlik mühitinə etiraz məqsədilə tələbələrin etiraz aksiyası keçirdiyi barədə məlumatlar yayılıb.